বালা সুজনা (প্রতিদান)
ইনজেব চাঙমা
এত্থে এক নাধা বন্দার পুঅ দীঘল পত বেই আহ্’দি যার, তে তার লেঘা পড়া খরজত্যা ঘরে ঘরে যেই পিনোন-খাদি আ নানাঙ জিনিচ বেজে। পুঅবো উরি আঘে এক্কো গাবে ধচ্যে সুলুম।
তার অমহদ’ পেত পুরের। তে মঞ্জুক গরল’ মুজুঙে যে ঘরান লাগত পেব’ সে ঘরাত্তুন কিঝু খেব’। মাত্তর, তে যে ঘরানাত যেল খেবার আঝায় সে ঘরানত্তুন এক্কো দোল মিলে নিগিলে এযানা তার পেত পুরানা কধা কবার দ’ দর আ লাজে ধচ্যে। তে বানা পানি খেবার মাগিল’। মিলেবো তা ধক বুঝি এক্কো দাঙর গলচ্চোই দুধ আনি দিল’। পুঅবো লারে লারে দুত্তান খেই কল- মর ক’ তেঙা দি পরিব এ দুত্তানত?
মিলেবো কল’- “তর কিচ্ছু দিয়্যা ন’ পরিব।”
পুঅবো কল- “মামা মরে কোইয়ে লোবিয়দ দান ফেরত দিয়্যা ন’ পরে। সালেন, মুই তরে বুগত্তুন ছাগি তুল্যা অতালিয়ে এ্যাংকুর (ধন্যবাদ) দিলুং।”
পুঅবো নাঙান তারুম।
তারুসে যক্যে দুত্তান খেই ঐ ঘরত্তুন নিগিলি যার, সক্যে তে কিয়েয়ান এক্কান বলপিয়ে পার। তারুমে ভগবান উগুরে অমহদ বিশ্চেস আঘে।
সময়র গঙারে কাদে গেল ভালক বঝর। এক দিন অই মিলেবো অসুক অহ্’ল। সিধু ডাক্তরউনে তারে মন বাজিয়ে চিকিৎস্যা গরানা পরও তারে গম গরি ন’ পারন। তারে পাদেলাক এক্কান দাঙর শহরত নাঙ ফুত্তে এক্কান হাসপাতালত। যিয়োত নানাঙ বেধি দোল চিকিৎস্যা গরা অহ্’য়। সিয়োত থেদ’ ডা. তারুম। সে মিলেবোরে চেবাত্তে বেক্কুনে তেম্মাং গরি ডা. তারুম’ আঞ্জামে ফেলে দিলাক।
যক্যে ডা. তারুমে শুনিল’ কন শহরত্তুন এস্যে মিলে সিবে তে চিকিৎস্যা গরানা, সক্যে তার মনত দাঙর এক্কা মনবল এল’। তে আ দিরি ন’ গরি কিজেখিচ্যা গরি সে মিলেবোরে চা গেল’। মিলেবোরে দিঘিনেই চিনি পাচ্যে ডা. তারুমে।
তে মনে মনে ইমে গচ্ছে যিক্যে গরি ওক এ মিলেবোওে বাজা পরিব। সে দিনত্তুন ধরি সে মিলেবোরে আলাদা গরি চিকিৎস্যা গরানা ফাং গরল।
তার অতালিয়ে চেরেস্টা আ মনবলে মিলেবো গম অহ্’ল।
ডা. তারুম হাসপাতালত ঐ মিলেবো যে বিল এলাক সিউন বেক সুজি (পরিশোধ) দিল’। আ তা কপিবোত এক কোণাত কি লিঘি দিনেই সে বিল কাগোচ্চান ঐ মিলেবোরে পাদে দিল।
মিলেবো মনে মনে বুগত দর সম্মে আ বিল কাগোচ্চান খুলিবারও দরার। কিত্তে, তে খবর পায় এধক দিন সং হাসপাতালত আঘে তা গোদা জীংকানিতও সে বিল সুজি ন’ পারিব।
শেজে লারে গরি কাগোচ্চান খুলি চেল’ আ দিঘিল বিলর কাগোচ্চানত এক কোণাত লেঘা আঘে- “তর চিকিৎস্যা খরচ অহ্’ল পুরো এক গলচ দুধ।” আ সে কাগোচ্চান’ তলেদি সাইন এক্কো আঘে ডা. তারুম।