১। এ দ’ আর দ্বি’ঘন্দা পর বাংলাদেঝত ভাঝর মাস আরগানি অব।
মাত্তর! যে দেচ ভাঝর লাড়েই গরি এক্কান দেচ আ রাঙা, এ্যাইল বাবদা পিয়ে সে দেঝর ৪১আন ভাচ কেঝান আঘে?
ভাঝর মাস এলে ইধোত উদে সালাম, বরকত, রফিক, জব্বার আ শফিউররে। তারার লো ধালি দিনেই এচ্যে সৌরজগত পিত্তিমি নাঙে গ্রহবোত বাংলাদেচ নাঙে এক্কান স্বাধীন দেচ পেলং।
মাত্তর! বাংলাদেঝর আদিবাসীউন ভাচ কেঝান আঘে?
২। ছবিবো জ্ঞানদোয় বন বিহারত। এচ্যে সাম্মাদিট্টি ফাউন্ডেশন ৪ বঝর পূন্নো অল। এ পোইদ্যানে এক্কো মিলনি খলা জুগল গরা অহ্’য়ে জ্ঞানদোয় বন বিহারত। ইয়ান খাগাড়াছড়ি জেলা মানছড়ি উপজেলাত।
বেন্যা সে মিলনি খলাবোত সরিত অবারত্যাই ধর্ম বিকাশ, তোষী আ টুটুলসুমুত্ত সিধু গেলং।
আঝা এল’- মান পেবার নয়, ইয়োত নানাঙ কিত্তেত্তুন নানান জ্ঞানী-গুণি, মায়-মুরুব্বীসুমুত্তন নানান জন সরিত অবাক। ইয়োত- মা ভাচ কিত্তে সাতকাম সে কধা কবার এক্কান জু অব।
মাত্তর! কন্না শুনিব আমা কধা?
ত্যুঅ দ’ কোই যা পরিব নিআলঝি গরি।
ও বাপ-ভেই, মা-বোন লক! এক্কো গল্পলোই তমারে কবার চাঙর। খবর পাং মা’ এ কধানদোই তুমি একমত অই ন’ পারিবা অনেগে। ত্যুঅ দ’ কোই পরিব।
যক্যে ইক্কুলত পরিদুং ম’ এক্কো ত্রিপুরা সমাজ্যা এল’ তা নাঙান বীরজয় ত্রিপুরা। মত্তুন ককবরক ভাচ শিঘিবার ভারি আওচ এল’। সেনে তে বীরজয় মরে শেঘে দিল’- “নন’ লানি হামসাগোই”। তে মরে ভাচ বোঝে দিল ইয়ান অর্থ তুমি কেঝান আঘ? মুই দোলে গরি খাদাত লেঘি নিলুং। বানা সিয়ান নয় আর’ ভালক্খানি শেঘে দিয়্যা। পুরো এক পাদাত লেঘিলুং।
ইক্কুল ছুটি অইনেই আমা গুরবোন (ত্রিপুরা মিলা)রে কলুং- নন’ লানি হামসাগোই। কনার পর তারা ককবরক ভাচ্ছোই কি কি কয় মুই খবর ন’ পাং। ন’ ভুঝং। দিপজ্যা গচ্যাতাগা ঝনঝনায় পারা এগজা ঝনঝনার।
তা কেল্যা বীরজয়রে সে কধা কলে বীবজয় বানা আহ্’জি আহ্’জি থায়।
এ গল্পবো কলুং সিত্তেই, ভাচ ন’ পারিলে কি দশা অয়। ইক্যে আমি আমা ভাচ, ওক্কোর ন’ পারিলে কেনে আমি অরুনাচল, মিজোরাম, িত্রিপুারত আ বার্মাত যে চাঙমাউন আঘন তারালোই কেনে অত রাঘেবং?
মাত্তর! এ পুজিবাদী যুগত আমনর এ কধানি কন্না মেহ্ত পেব? কিত্তে, চাঙমা লেঘা শিঘিলে কি জিংকানি তোড়ে পারে? ইয়ান বেগর পুজোর।