Linkeei

4 年

“বেধক্যে”
এত্থে এল’ বেধক্যে। তে ইক্যে ভারী নাধা। মানচ্ছো ঘরত কাম ন’ গরলে তা পেদত ভাত ন’ পরে। দিনে আনি দিনে খায়। মাত্তর! আগে তার ঘর গিরিত্তি দপদবা এল’। এল’ থানেথমগে। যিয়েন আহ্ত দে সিয়েন পায়। তার এক্কো গরি নাধুকতুক্যা ঝি অসুক অনার জাগা-জমি বেক মাজনর ঘর বিজি পেল’। তারা আদামত বেগে দোলে জঙজঙ গরি চলদন। বেগ’ ঘর গিরিত্তি থানেথমগে। বেধক্যে যক্কে থাগোয়ে এল’ বেক্কুনরে পারজার চালে দে। কন’ জনে থেগত পরলে তারে যিংরি পারে এজাল দিদ’। এধক্যে গরি দোল এক্কান আদাম বানিলাক। কন’ জনে তেঙা দুক্যে চাগুরি ধরি ন’ পারলে বেধক্যে ইদু তেঙা চা এদাক। আ বেধক্যেয়্য তাইদ্যা পক্কে না ন’ গরে। ইক্যে আদাম্যাউন বেগে চাগুরি বলা, জাগা জমি থেপতেপ্যা।
মাত্তর বেধক্যে! তার দ’ মাধাত থানিলে থেঙত নেই থেঙত থানিলে মাধাত নেই। কধা আঘে- গরেঙ মরোঙয়্য চর অয়, চর মরোঙ গরেঙ অয়। ইক্যে বেধক্যে তা ঝিবোরে চিকিস্যা গত্তে গত্তে বেক আহ্’ত জারা অহ্’ল। আ তা ঝিবোরেয়্য বাজে ন’ পারে। ধনে জনে বেক নাচ অহ্’ল। মানজোর ঘরত কাম ন’ গরলে পেদত ভাত ন’ পরে। তারে ইক্যে কন’ জনে দয়ে গরিয়ে নেই। আদাম্যা মানুচ্ছুন পত্তিক বঝর আদাম কিয়োঙত ন’ কোলেই আদাম’ বারেদি কিয়োঙত দান ধর্ম আ পত্তিক বঝর জিদেজিত্তে গরি কঠিন চিবর দান গরি দ্যুন। লাক লাক তেঙা দান গরন। মাত্তর! তারার কায় বেধক্যেরে এক্কায়্য চোগত ন’ বাজান। রিনি ন’ চান। অথচ অয়নত-তয়নত তারার কামত বেধক্যে লাগে। গুরোব’ অলে বেধক্যে, বুরবো অলে বেধক্যে- ইআন গর, উবান গর। কুর কাবা, ছাগল কাবা বেক্কানি তেয়্য গরি পাই। কিয়োঙত গেলে বেক বল’ কামানি তারে বাজে দিদাক। তুয়ো বেধক্যে সজ্য গরে। রাক পানি গরি যে যিয়েন বাজে দ্যুন সিআন গরে। একদিন বেধক্যে মনে মনে আভিল্যাচ খার- আঃ ইআন কয় মানেই জীংকানি! মুই যক্যে মাজন এলুং সক্যে দ’ কাররে কুলি ন’ গরং। সে পাওত্তি ইক্যে পাঙর। যারে যিঙরি পারে এজাল দিলুং। ইক্যে মর নেই কারর এজাল পানা দুর’ কধা নাঙয়্য ন’ গিনন।
মাত্তর বেধক্যে কাররে বর কধা ন’ কয়, ঘেইল ন’ দে। বানা নিজ’ ভাগ্যরে দুচ দে। কয়- তেঙা পয়স্যাউন যুনি মানচ্ছোরে ন’ দিন্যাই ব্যাংগত জমা রাঘে দিদুং এধক ধোই ধোই খেদুং খেই ন’ পুরেলুঙুন। এধক্যে গরি বেল্যা ঘুমত পরলে দ্বি নেক মোগে আভিল্যাচ খান।
একদিন অল’ কি! স্বর্গত্তুন দূত এক্কো এল’। সে আদাম্যাউনরে দাগি কল’- তুমি দ’ পত্তিক বঝর দান ধর্ম গর, কুর শুগর ন’ কাব’। সিত্তেই স্বর্গ পত্তান খুল দি অয়্যা। তুমি ইক্যে স্বর্গত যেই পারিবা। এ কধা শুনি আদাম্যাউন খুজি। বানা বেধক্যে সানা ভুরত বুজি দাবাবো কনাজাবাত দিন্যাই আমক গরি বোই আঘে। বেক্কুনে ধাবা দেদন তাত্তুন জে আক্কল, তাত্তুন জে আক্কল গরি। ইন্দি তারা কত্তমান ধার্মিক পরিক্কে গরিবাত্তে স্বয়ং গোজেনে লাম্মে। পদ’ কায় এক্কো মরা মরা গরুলোই বেদা দিল’। তারা চোগেদি দেঘন- পুদত্তুন এক্কো বুরো মানুচ কাজি ধরিনেই গরুবোরে থানি তুলিবার চার মাত্তর, ন’ পারের। কারর বল পেলে গরুবোরে পুদোত্তুন তুলি পারিব’। মাত্তর কন’ জনে তারা বল দিবার গরচ মনে ন’ গরন। বানা স্বর্গ মক্যে যাদন।
বেগ শেজে বেধক্যেদাঘী তারা দ্বি জনে সিয়োত লুমিলাক। তারায়্য দেঘন এক্কো বুর মানুচ এক্কো গরু কাজি ধরি পুদত্তুন তুলিবার চার। তুলি ন’ পারের দিঘি কিজেখিজ্যে গরি বুজ্যারে তারা বল দিলাক। তারার বল পেনেই গরুবো পুদত্তুন তুলি পাচ্ছোন। বুজ্যা তারা বর দিল’। আ কল’ তুমি স্বর্গ ন’ যেয়ো ঘরত ফিরি য’। বুজ্যালোই বুরি ঘরত ফিলিলাক।
ইন্দি যারা স্বর্গত যাদন তারা আধা পদত ঘুরঘচ্যা আন্ধার রেত লামি এল। বর বোইয়ের বাহ্’র। চোক চোক দেবা কালা। আগাচ ঘুমনিয়ে পেদ’ তিলোই কাবে। বেক্কুনে যে যিন্দি পারে, যে যিন্দি চোগ’ পহ্’র দেঘে পারন তোরেবাত্তে ধেই গেলাক। নেগে- মোগে ফারক, বাবে - পুদে, মা-ঝিয়ে আহ্’রা আহ্’রি অই শেজে বেগে আদামত ফিরি এলাক। স্বর্গ যানা তারার সিয়োত থুম অল’।
ঘরত ফিরি নানাঙ অসুক -বিসুকে তারা ঘর গিরিত্তি রজাত্তলে পরি যেল’। বেধক্যে গোজেন বরে দোল সংসার থিদ’ অল’।
23 নভেম্বর, 2018 ·