পাত্তুরুতুরু, পাত্তুরুতুরু, পাত্তুরুতুরু
তেতুলতলা অগ্রমৈত্রী বিদর্শন ভাবনা কেন্দ্র আ দিঘীনালা বন বিহার পরিচালনা কমিতিদাঘিরে। এচ্যে তারার এজালে ( ভাইবোন ছড়া ইউনিয়নের বৈশালী নগর আদামর ১। অনুক্ষ চাকমা, স্তন ক্যান্সার, ২/ যুগাঞ্জল চাকমা, থেং ভাঙা আ বুগ আহ্’র ভাঙা), ৩/ হিরশ্বর চাকমা, চোগ’ অসুক) এক গিরির তিন জন অসুক্যালাই উগুরেদি লেঘা দ্বিয়ান কথিন চীবর দানত তেঙা তুলি দিয়্যা অহ্’য়্যা।
ইয়োত যারা তেঙা এজাল দিনেই মুজুঙে আক্কোই এচ্ছোন তারাদাঘিরে চাঙমা সাহিত্য বাহ্ তপ্পেত্তুন পাত্তুরুতুরু আ ঝু ঝু জানের।
ইয়োত ভাঙি কনা গরচ, দিঘীনালা বন বিহার কথিন চীবর দানত যারা তেঙা তুলি দিলাক তারা অলাক্কে চাঙমা সাহিত্য বাহ্ সাবাঙ্গী সুনানু নিকো চাঙমা আ সজীব চাঙমা দাঘি। তারা অলাক- দিঘীনালাত পল্যা খাগড়াছড়ি মহিলা কলেজ ইংরেজি মাচ্তর সুনানু কৃতি চাঙমাদাঘি তেঙা এজাল দিনেই তেঙা তুলনা ফাংগরা অয়। ইয়োত ৬৬৯০ তেঙা উদিলাক।
তেতুলতলাত যারা তেঙা তুলিলাক তারা অলাক্কে চাঙমা সাহিত্য বাহ্ খাগাড়াছড়ি জেলা কমিতি এজাল দাঙর কাবিদ্যাঙ সুনানু তোষী চাঙমা, সাবাঙ্গী সুনানু বৈশাখি চাঙমা, সুনানু জেকি চাঙমা, দিঘীনালা ধেলা জধানানু সুনানু বিদর্শী চাঙমা, ভান্ডালি কাবিদ্যাঙ সুনানু সূচনা চাঙমাদাঘি আ অসুক্যা তপ্পেত্তুন সুনানু আরসন চাঙমা।
তারা জানেলাক, ইয়োত পল্যা তোষী, বিদর্শী, সূচনা, বৈশাখী, জেকি চাঙমা দাঘি তেঙা এজাল দেনা ফাং গরিলে তেঙা তুলনা আরগানি গরা অয়। ইয়োত ৭০০০ তেঙা তুলি দি পারিলাক।
শেজে চাঙমা সাহিত্য বাহ্ তপ্পেত্তুন যারা এ কামানত মনর, ধনর এজাল দিনেই এক্কো গিরিরে পিত্তিমি পহ্’র মু দেঘেবার মুজুঙে উজে এলাক তারাদাঘিরে আর একবার ঝু ঝু, পাত্তুরুতুরু আ অতালিয়ে কোচপানা গজের।
