ক’ জনে ভাবি মা ভাঝর কধা
১। বায়ান্ন ভাঝর লারেয়ত মুলুক কধা এল’ রেজ্যত যেদক্খানি ভাচ আঘে বেক ভাচ্ছানি দিঙিরি দিয়্যা পরিব’। কন’ ভাচ হ্’েলা ফেলা বা কারর অধিনত রাঘা ন’ যেব’। এ কধা মজিম বাঙাল জাত্তো আক মলিম অই উর্দুর সান বাংলা ভাচ্চানরে রেজ্য ভাচ ইজেবে দিঙিরি পেবার পাকিস্তান শাসকগোষ্ঠীরে বাধ্য গচ্ছোন। যে বাঙাল জাত্তো আকমলিম অই ভাঝর অধিগার পেবার লারেই গচ্ছোন সে জাদে ১৯৭১ সালত সাধিন বাংলাদেচ পিত্তিমি নাঙে গ্রহবোত থিদ’ গরিনেই দেঝর অন্য ভাঝার অধিগারর কধা ইধোত নেই আর। ইয়ানর সান দাঙর আহ্’ভিল্যাচ আর কি থেই পারে।

২। উগুরেদি কধান কবার আঘে নিজর মাধা পেজা এক্কা রিনি চেই।
১৮৬০ সালর। নানান খবর’ নালে খবর পেই ব্রিটিশউনে পার্বত্য চট্টগ্রাম দঙল গরানা পর তারা লেঘা পড়া গরিবার পত্তম এক্কান ইক্কুল চালু গচ্ছোন “চট্টগ্রাম বের্ডিং ইক্কুল” নাঙে। সিয়োত বাংলা-ইংরেজি সমারে চাঙমা আ মারমা ভাচ পড়া অহ্য়। মাত্তর, আমা চেলাউন ন’ চানা ম-ভাচ্ছোই লেঘা শিঘানা বন্ধ অই যায়। চাঙমাউন কবালত ন’ ফুদিল ঝিগে ফুল। সে পরে ১৯৩৭-৩৮ সালত হারবার্ট ফ্রেডারিক মিলাররে রাঙ্গামাটি হাই ইক্কুলর মুরখাম (প্রধান শিক্ষক) আ পার্বত্য চট্টগ্রামর শিক্ষা বিভাগর ডাইরেক্টর বানা অলে চাঙমা ভাচ্ছোই লেঘা শিঘার জু গরি দে। সক্যেয়্য সুনানু কামিনী মোহন দেবানদাঘি মা-ভাচ্চোই লেঘা শিঘানা ন’ চানার চাঙমাউনর কবালত আর দুক লামি এল’।

এ পর এল’ পাকিস্তান আমল। ১৯৫৯ সাল, সুনানু নুয়োরাম “চাঙমার পত্তম শিক্ষে” নাঙে এক্কো চাঙমা লেঘা বই ইক্কুলর কারিকুলামত রাঘা অইয়ে। সিয়োতয়্য দেবান দাঘি খদার পাদারি থানা চাঙমাউন আর মা-ভাচ্ছোই লেঘা শিঘানা ন’ অহ্’য়। বারবাঙানে চাঙমাউন নিজ’ মা-ভাচ্ছোই লেঘা শিঘানা জু পানার পরয়্য নমিজিল্যা দেবানদাঘি ন’ চানার এচ্যে চাঙমাউন দাঙর এক্কান জাদর চিত কলজ্যা আমাত্তুন আহ্’জি যার।

কোই কত্তে, যে দেচ ভাঝত্যাই লাড়েই গরি এক্কান মানচিত্র আ রাঙা হ্’েইল বাবদা পিয়ে সে দেচ দেঝর অন্য ভাচ্চানি কেনে সাধিনতা দ্বি পিড়ির(দুই প্রজন্ম) পরও থিদ’ গরিবার চিদে ন’ গরের আ আমি আমা ভাচ্চানিরে কত্তমান কোচপের?
মাত্তর! মর এ পুজোর ইরুক অক্তত গরচ নেই মনে গরঙর। কিত্যা যিয়োত নিপরভা (নিরাপাদ) নেই, যিয়োত অনসুর রাহ্’ত আর রাহ্’ত (অভাব এবং অভাব) সিয়াত মা-ভাচ বাজানা কধা কনা চোক ফেরফেরে ছন্দভাচ মাধানা বাদে কিচ্ছু নয়। দেঘা যার কেঝান দিন গঙে দেদন হিলর মানেউন। গেল্লে (১১ আগস্ট ২০২২ খ্রি.)ø কেল্যা উরবোতাদ’ নালে ফেসবুকত দেঘা যিয়ে যিয়োত পরান তোরেবাত্যা এক্কো চাঙমা মিলে তা’ পুঅবোরে বিজিবাত্যা খাগাড়াছড়ি মধুপুর বাজারত তুল্যাগোই। কধায়ান কধে বেশ্রি অলেও সত্য যে, ১২০০০ তেঙা দর কলেও শেজে ৫০০০ তেঙালোই বিজিল’। এ কধা জানা-জানি অহ্’লে তারে মিজিলিক ভিলিনেই কিয়েচ গরা অহ্’য়। শেজে কয়েকজন মায়মুরব্বি উদ’ লোই চেলাক অভাবত্তুন তা পেদ কেচ্চবো বিজি পার। শেজে কমলছড়ি ইউনিয়ন গরোনি খবর পেনেই তা আঞ্জামে নিল খবর পা যেল’।

অন্য কিথ্যাদি যুনি আমল গরি রিনি চেই দেঘা যায়, এধক রাহ্’দ’ সেরে সেরে আমি নানাঙ জাগাত চিত জুরায়, মন গলে সেধক্যে কিয়োং তুলি পারি। দেঘিলে মনে অহ্’য় আমার বেক থিক, রাজনৈতিক, সামাজিক অর্থনৈতিক। মাত্তর, সেধক্যে আমি নয়, এক্কানে এক্কান রাহ্’ত। রাহ্’দ’ কধা কলে থুম নেই। মুই আমাক অং মা-ভাচ্ছান রখ্যে গরিবার সেধক মানুচ তগে চুপ পা ন’ যায় আ সেধক্যে মানুঝর ধারাচ গরচ নেই। কিত্যা ইয়ান? আমি পর জনম বিচ্ছেছি। এ জনম লাক লাক তেঙা খরচ গরি কঠিণ চীবর দান, ভান্তেদাঘিরে গাড়ি কিনি দি পারিলে পর’ জনমত সে ফলে পেবংগোই। আর ইত্তুন বেচ দাঙর মানেই ইজেবে জনম লোই পারিবং। ভান্তেদাঘিরে গাড়ি কিনি দেনা আ কিয়োং তুলানা দুচ দিবার ন’ চাঙর। কবার চাঙর, যে ভাচ্চোই একজনে আর একজনরে মন কধা ভাঙি কোই পারি, যে ভাচ্চোই বেন্যা পোত্যা ঘুমত্তুন উদি কোই কি গরি পারির, নেগে-মোগে, ঘর গিরিত্তি উজন্দিত্যাই, সমাচ ভালেদিত্যাই মন’ রিবেঙর কধা ফগদাঙ গরি পারির সে ভাচ ভচ যাদে আমার কিত্তে কিয়ে ন’ পরার? মাত্তর আমি কি কন’ দিন একবার ভাবি চেয়েইর, ভাচ ন’ থেলে বা আহ্’ঝি যেলে সে জাদর মাজার ন’ থায়।

মুই আঝা গরং, এচ্যে যারা সমাচ ভালেদি কধা চিদে গরির তারা উজে এবাক মা ভাচ রখ্যে গরিবাত্যা। মুই বিশ্চেচ গরং, ঘরর চেরো পালা সিসি ক্যামরা বজেলে ঘর রখ্যে ন’ ন’অহ্’ভ। সমাচ রখ্যে গরিলে আগ দিনর সান দুয়োর খুলি ঘুম যেই পারিবং, নিপরভা গরি। সমাচ রখ্যে গরিবার চিদে বুগত সমেলে ভাচ রখ্যে গরিবার কধা আগে উদি এব’ কিত্যাই, আমি সে ভাচ্ছোই মন’ গরেঙর কধা ফগদাঙর গরি। সেনে ভাচ অহ্’লদে পিত্তিমি পরানবলাউনত্যাই এক্কান দাঙর আহ্’ত্যার। যা অনমুর মানেকুল মঙ্গল গরে। সক্যে রনজিত দেবানদাঘি আর’ সুর তুলি নাঙেল পিদিত্তুন গেব’-
ন’ চাং যেবার জাগান ছারি, ইধু আঘং জনমান গরি
এ জাগানত রয়েদে ম’ মনান জুরি...।https://web.facebook.com/photo....?fbid=17294863940663