এয’ শিঘি নিজ’ ধাবে নিজ’ গরজে মা ভাচ শিঘি
আমি বুক অজল গরি কোই পারি আমি চাঙমা, আমার মা- ভাচ, ওক্কোর, সাহিত্য সংস্কৃতি বেক আঘে। যা অন্য দাঙর দাঙর জাদর নেই। মাত্তর, আমা চেদন ন’ থানার আমা ভাচ আ ওক্কোর ফুরি উদি ন’ পাত্তন। যারা দাঙর দাঙর ডিগ্রিবলা তারা আওচ নেই নিজ’ ভাচ, নিজ’ লেঘা শিঘিবার। পাত্তে ভাগে তারা কধাত কধা ইংরেজী - বাংলা ভাঝে কধা কন। যিয়েনরে মুই কং চাংলা আ চাংলিশ। যারা সাহিত্য চচযা গরন তারা বাংলা ভাঝে সাহিত্য চচযা গরন। চাঙমা ভাঝে সাহিত্য চচযা গরিবার কলে বেজার পান। আর একদাঘি চাঙমা শব্দ রাদর কধা কন। সিত্তেই এচ্যে জাদর সাহিত্য সংস্কৃতি মা-ভাচ ওক্কোর বেক ধীমে ধীমে। তারার আগুন এচ্যে জাত্তো পোইয়ে পার। তারা খবর পান মাইকেল মধুসুধন দত্ত মা ভাচ নিনেই কি কোইয়ে, কবি গুরু রবিন্দ্রনাথে কোইয়ে- আঘে চাই নিজ’ ভাচ ঘাটুনি তারপর ইংরেজি ভাচ পত্তন। র্তু কিত্তেই আমি এধক খবর পানা পরয়্য অলিপ গরির?
ও পরা কবাল্যা চাঙমা জাত! এধক কি পরাবান্দারা অলে? তুই যারে নিনেই বার গরিদে এচ্যে তারা ত’ ভাঝে ন’ মাদন। এচ্যে যারা দাঙর দাঙর ডিগ্রি লদন তারা দ’ তরে ন’ চিনদন। ত’ চিন পচ্যে দি ন’ পাত্তন। বানা নাঙ শেজে চাঙমা লেঘদন। সে বাদে কিচ্ছু নেই। ভান্তেউন অলাক ভাগত্তুন ভাক, রাজনীতি কধা দ’ কোই ন’ যায়। যারা অহিংসা বুদ্ধবাণী ফগদাঙ গরি গরি আঘন তারা এধক্যে অলে কেনে জাত তিগানা?
যা ওক পর্বোয়া লক! এয’ সময় আঘে, এয’ বাক থুম গরিবার বল আঘে। ঘরে ঘরে এচ্যে পর্বোয়া বান্দা ভেদা দেদন। এচ্যে মানব সেবা গরিয়ে বহুত বান্দা আঘন, নুয়ো নুয়ো জধা আরগানি অয়ে - গত্তন। আমি যে কাম গত্তং সাত আমাত্তুন কারলোই কধা কধে লাগে ভাচ। কাররে মন’ কধা, বুগ’ ভিদিরে কধা ভাঙি কধে লাগে ভাচ। মাত্তর, আমা সে ভাচ্ছান জাঙারে ধচ্ছে। যক্যে অকেজো অভ’ সক্যে কার’ লাগত কেও ন’ পেবং। যিক্যে গরি এচ্যে বার্মা চাঙমাউন আঘন। মনে কলে তারালোই ইক্যে কধা কোই ন’ পারির। তারা কায় যেই ন’ পারির। এচ্যে তারায়্য যুনি চাঙমা ভাচ পারিদাক দোল এক্কো রেগা অদ। যিক্যে গরি ভারদ চাঙমাউনদোই রেগা অল’। এচ্যে মনে কলে ফেসবুক কধা কধং। তারা মা- ভাচ চাঙমা ভাচ্ছান ন’ পারানাই মুজুঙ দাঙর এক্কো মুরোহ্ আঘে। সুগ’ কধা অলদে তারায়্য ইক্যে চাঙমা ভাচ্ছান চচযা গরিবার চাদন। গেল্লে মাজত ১৯ ( এচ্যা 28 অক্টোবর, 2018) তারিগত জ্যোতিপালা ভান্তে ভিডিও কল গরি আমাত্তুন কিঝু বই চেল’। ইক্যে গরি তারায়্য জাগি উদন।
ও জাদর ভেই বোনুন, তুমি চ’ এচ্যে এগে এগে আমি কুধু লেম পুরি আঘি? পরাকবাল্যা চাঙমা জাত্তো শত শত বঝর ধরি কাবান খাদে খাদে পিত্তমরা অলং, নেই কন’ দেচ, অলং ছিত্রিংপাত্রাং। সিত্তেই জাদর বিজক নিনেই থানাথানি, ভেইয়ে ভেইয়ে লার্ড়ইে, খবর নেই আমা জাদর ভেই বোনুন কুধু পরি আঘন? বার্মা, থাইল্যান্ড, বিহার নাকি অন্য কন’ রেয্যত? সিআন বাদেয়্য জাদর ভাচ, ওক্কোর লুগি যেবার অক্ত অয়ে। ইক্যে জাদর দাঙর মঙ্গলত্তে, জাদর দাঙর এ্যারানত্তে আমাত্তুন জাদর লেঘা শিঘা পরিব’। তুমি খবর প’ বাংলা সরকাচ্যা আমারে জাঙিছরা পাত্তেদ্যা? পার্বত্য চুক্তি ১৮ বঝর পর আমা মা ভাঝে লেঘা শেঘাবার জু গরি দিল’। মাত্তর আমি পরে ন’ পারির। সে এ উদ্দোক সরকারে বহুত বঝর আগে নিদ’ সক্যে এ আহ্’ভিল্যাচ ন’ এদ। আমাত্তুন নিজ’ গরঝে শিঘা পরিব’। বাধ্য গরা পরিব’ যিক্কে গরি পার্বত্য চুক্তি গত্তে বাধ্য গচ্ছেই। এয’ শিঘি নিজ’ ধাবে নিজ’ গরজে মা ভাচ। মানচ্ছে পত্তোক বা ন’ পত্তোক নিজ’ ভাঝে সাহিত্য চচযা গরি। সক্যে জাত্তো থিগি থেব’। তার আঘে নয়।
লেঘানা: 28 অক্টোবর, 2018 ·
